साक्षरताको परिभाषा बदल्नुपर्छः मन्त्री घिमिरे

भक्तपुर । प्रदेश १ का सामाजिक विकास मन्त्री जीवन घिमिरेले विद्यालयलाई झोला र किताब विस्थापित गरी प्रविधि मैत्री बनाउनुपर्र्ने बताएका छन् । शिक्षा पत्रकार समूहले ‘कोरोना प्रभावमा प्रदेश १ को शिक्षा क्षेत्र व्यस्थापनको तयारी’ विषयमा आयोजना गरेको भर्चुअल प्रेस मिटमा उनले अब समयानुसार विद्यालयलाई प्रविधिमैत्री बनाउनेमा प्रदेश सरकार केन्द्रित रहेको जानकारी दिए ।

लकडाउन सुरु हुने अगावै प्रदेशका १ सय विद्यालय छनोट गरी प्रविधिमैत्री कक्षा सञ्चालन गरिरहेको बताउँदै उनले भने, ‘पहिलो चरणमा १ सय स्कुलका केही शिक्षकलाई तालिम दिँदै आएका थियौँ । सबै सामग्री विद्यालयका ल्याबमा नै सीमित भएकाले अहिले लकडाउनले गर्दा यी कक्षा स्थगित भएको छ ।’

‘लकडाउनको समयमा एसईई दिने विद्यार्थीको लागि गत महिनाको १५ गतेबाट एन.टि.भि इटहरीमार्फत कक्षा सञ्चालन गरिरहेका छौँ । इन्टरनेटमा पहुँच भएकाले अनलाईनबाट, नभएकालाई टेलिभिजन र रेडियोबाट र ती सञ्चार साधन पनि नभएकालाई टेलिफोनको माध्यमबाट शिक्षक र विद्यार्थीलाई जोडिरहेका छौँ ।’ उनले थपे, ‘लकडाउनले सबैलाई इन्टरनेटको महत्व बुझाएको छ । इन्टरनेट पहुँच नभएकालाई पहुँचको लागि पहल गर्ने र इन्टरनेट नभएका सबै विद्यालयमा इन्टरनेटको पहुँच पुर्याउने योजनामा छौँ ।’

अनलाईन शिक्षालाई पहिलैदेखि प्रदेश १ ले महत्व दिँदै आएको औल्याउँदै दोस्रो चरणमा छनोट गरिएको १ सय १२ विद्यालयमा कम्प्युटर ल्याबको निर्माण गर्ने प्रक्रिया अघि बढाइएको र प्रदेश १ का १४ जिल्लाबाट ६ सय शिक्षकलाई इ लर्निङ कक्षा सञ्चालन गर्दै आइरहेको उनले जानकारी दिए ।

त्यस्तै अहिलेको समयमा साक्षरताको परिभाषा बदल्नुपर्ने विचार राख्दै उनी भन्छन्, ‘अहिले पहिला जसरी क,ख लेख्न जान्नेलाई साक्षर भनेर गनिनु हुँदैन । अहिलेको डिजिटल युगमा डिजिटल साक्षरता भनेर हेरिनुपर्छ । हाम्रो प्रदेशलाई साक्षर प्रदेश घोषणा गर्न २ जिल्ला बाकी छन् ।’

शिक्षक र अभिभावकलाई डिजिटल साक्षरता कक्षा सञ्चालनका साथै शिक्षा दिवसदेखि विद्यालयमा निर्माण भएका आमा समूहलाई डिजिटल साक्षरता कक्षा सुरु गरेको र यो प्रभावकारी रहेको उनले प्रष्ट पारे ।

:438 Views

Leave a Reply