पुस्तक किन्दा होसियार!

भक्तपुर । पाठ्यक्रम विकास केन्द्रका निर्देशक गणेशप्रसाद भट्टराईले लकडाउनको समयमा स्थानीय पालिका, विद्यालय र नजिकका शिक्षकमार्फत सिकाइ सामग्री निर्माण गरी विद्यार्थीको घरसम्म पुर्याउन सकिने बताएका छन् ।

‘चालु शैक्षिक सत्रमा विद्यालय तहको पाठ्यपुस्तक र पाठ्य सामग्री व्यवस्थापन कसरी?’ भन्ने विषयमा गरेको शिक्षा बहसमा उनले अहिले पढाउने भन्दा पनि सिकाउनेमा केन्द्रित हुन शिक्षक र विद्यालयहरूलाई आग्रह गरेका छन् । ‘किताब बाहेक सिकाउने माध्यम धेरै हुन्छन् । पाठ्यक्रम विकास केन्द्रले पाठ्यपुस्तक मात्र नभई शिक्षकका लागि शिक्षक निर्देशिका पनि केन्द्रको वेवसाइटमा राखेको छ । त्यस्तै साना विद्यार्थीका लागि १५० भन्दा बढी सन्दर्भसामग्री वेवसाइटमा राखिएको छ ।’ उनले भने ।

केही न्यून पुस्तक छपाइ बाकी भएपनि यो शैक्षिक सत्रका लागि आवश्यक पाठ्यक्रम तयार भइसकेको औल्याउँदै पाठ्यपुस्तक छपाइमा नभई वितरणमा समस्या देखिएकोमा उनले चिन्ता व्यक्त गरे । दुर्गम जिल्लामा फागुनदेखि नै पठनपाठन सुरु भइसकेको उनले जानकारी दिए । इन्टरनेटको सुविधा भएकाले केन्द्रको वेवसाईटबाट पुस्तक हेर्न सक्ने र पहुँच नभएका ठाउँमा रेडियो र टिभी माध्यमको प्रयोग गर्न सकिने उनको सुझाव छ ।

उनले सबै पुस्तक पाठ्यपुस्तक नभएको स्पष्ट पार्दै कक्षा १ को पाठ्यसामग्री हालसम्म स्वीकृत नभएको दाबी पनि गरे र भने, ‘अहिले बजारमा पाठ्यक्रम विकास केन्द्रद्वारा स्वीकृत भन्दै केही पुस्तकहरू आएको देखिएका छन्, जुन केन्द्रले स्वीकृत नै गरेको छैन । २ हजारसम्म मूल्य भएका कक्षा १ का पुस्तक बजारमा भेटिएका छन्, त्यस्तो गर्न पाइदैन ।’ उनले थपे, ‘अबको सोमबार सबै प्रकाशकलाई पुस्तक माग गरेका छौँ । स्वीकृत भएपछि मात्र ती प्रयोगमा आउन पाउँछ । जनक शिक्षा सामग्रीमार्फत प्रकाशन भएका किताब विद्यालयमा लगाएपछि आवश्यक परेमा मात्र यी सन्दर्भ सामग्री पुस्तकहरू लाग्ने हुन् ।’