अनलाईन पढाउने अवस्था छैनः मन्त्री सुवेदी

सुदूरपश्चिमका सामाजिक विकास मन्त्री कृष्णराज सुवेदीले प्रदेशमा इन्टरनेटको सुविधा राम्रो नभएको बताउँदै आफ्नो प्रदेशमा अनलाइन कक्षा सञ्चालन गर्न नसकिने उल्लेख गरेका छन् । शिक्षा पत्रकार समूहले आयोजना गरेको भर्चुअल प्रेस मिटमा मन्त्री सुवेदीले लकडाउन नखुल्दासम्म शैक्षिक गतिविधि गर्न नसकिने बताएका छन् ।

सुदूरपश्चिममा कोरोना संक्रमित बिरामी उपचारपछि घर फर्किसकेको र नयाँ संक्रमित नभेटिएकाले लकडाउन नलम्बिने अनुमान गरी लकडाउन खुलेपछि नै विद्यार्थी भर्ना र नियमित कक्षा संचालन गर्ने निर्णयमा पुगेको देखिन्छ।

कोरोना संक्रमण फैलिएर लकडाउन महिनौ लम्बिने स्थिति आए रेडियोबाट कक्षा संचालन गर्नेबारे सोँच बनाइएको मन्त्री सुवेदीले जानकारी दिए ।

सुदूरपश्चिमका १ सय १२ विद्यालय भवन अहिले क्वारेन्टाइनमा परिणत भएका छन् । कोरोना संक्रमण सकिएपछि ती विद्यालयहरु सरसफाई गरी सेनिटेराइज गरेर संचालनमा ल्याउने उनको भनाई छ ।

सुदूरपश्चिम सरकारले आउँदो आर्थिक वर्षको बजेटमा शिक्षा र स्वास्थ्यको प्रदेश बजेट बृद्धि गर्न लागेको बताइएको छ । विद्यालय पूर्वाधार विकास र प्रविधिका लागि बजेट बृद्धि गर्न लागेको उल्लेख गर्दै उनले भने, ‘गत वर्ष ८८ विद्यालय निर्माण गर्यौँ । यो वर्ष पनि ६४ विद्यालय निर्माण हुँदैछन् । अब सुदूरका कुनै पनि विद्यार्थी खुला चौरमा बसेर पढ्नुपर्ने छैन ।’ साथै प्रदेशमा भएका ४ तालिम केन्द्रमध्ये हाल दिपायलबाट प्रविधिसँग जोडेर शिक्षक तालिम दिइरहेको उनले उल्लेख गरे ।