पर्वतारोहण विषय अध्यापन गर्ने पहिलो मुलुक नेपाल

– हरिसुन्दर छुकां/ ललितपुर २१ साउन । नेपाल विश्वमै पर्वतारोहण विषय अध्यापन गर्ने पहिलो मुलुक बनेको छ ।

पर्यटन क्षेत्रको ठूलो सम्भावना भएको देश नेपालमा पर्यटन र पर्वतारोहण विषय अध्ययनका लागि क्याम्पस तहमा पर्वतारोहण विषयको अध्यापन सुरु गरिएसँगै नेपाल विश्वमै सो विषयको अध्यापन हुने पहिलो मुलुक बनेको हो ।

नेपालमा गत वर्षदेखि पर्यटन विषयको पठनपाठन सुरु गरिएको नेपाल माउन्टेन एकेडेमीले जनाएको छ । एकेडेमीकी शैक्षिक संयोजक अदिता खनालले गत वर्षबाट पठनपाठन भएको उक्त विषय २३ जनाले अध्ययन गरिरहेको बताइन् ।

कूल ४ वर्षे कोर्स ८ सेमेष्टरमा सकिने एकेडेमीले जनाएको छ । सो विषय अध्ययन गर्न नेपाली विद्यार्थीलाई कूल रु. ६ लाख। सार्क मुलुकका विद्यार्थीका लागि रु. ८ लाख र अन्य मुलुकका विद्यार्थीलाई रु. १२ लाख निर्धारण भएको संयोजक खनालको भनाइ छ ।

‘विश्वमै तालिमको भरमा चल्दै आएको हिमाल आरोहणसम्बन्धी पढाइ नेपालमा शैक्षिकरुपमा अगाडि बढ्नु सकरात्मक रहेको छ । अहिले पर्यटनबारे अध्ययन गर्न विभिन्न मुलुकका पर्यटक नेपाल आउने गरेका छन् ।’

उनले व्यवस्थापन संकायअन्तर्गत रहेर सो विषयको पठनपाठन भइरहेको बताउँदै सो विषयमा बढीभ4न्दा बढी प्रयोगात्मक कक्षा हुने पनि बताइन् । ललितपुरको चापागाउँ जाने सडक टुटेपानीमा रहेको सो एकेडेमीमा पर्यटनसँग सम्बन्धित विषय अध्यापन भएपछि नेपालको पर्यटनलाई अझ व्यवस्थित गर्न सहयोग पुग्ने देखिएको छ ।

नेपाल विश्वमा पर्यटन ‘हब’का रुपमा परिचित भएपनि यस क्षेत्रले खासै गति लिन नसकेको अवस्थामा पर्वतारोहणको विषय अध्यापन हुनुलाई सकरात्मक मानिएको छ ।

पर्वतीय पर्यटन र हिमाल आरोहणको प्रमुख केन्द्रका रुपमा परिचित नेपालमा पर्यटन विषय अध्ययन हुनुले नेपाललाई पर्यटन अध्ययन गन्तव्यका रुपमा पनि चिनाउन सहयोग मिल्ने पर्यटन विश्वविद्यालयका अभियन्ता हिमाल आरोही टासीलाक्पा शेर्पाले बताए ।

माउन्टेन एकेडेमीकी संस्थापक कार्यकारी निर्देशक लाक्पाफूटी शेर्पाले आफ्नो लामो अभियानले सार्थकता पाएको भन्दै नेपालको हिमाल र यहाँको पर्यटनको विश्वबजारमा ज्ञान अभिवृद्धि गर्न मद्दत मिल्ने बताइन् । ‘विश्वमै तालिमको भरमा चल्दै आएको हिमाल आरोहणसम्बन्धी पढाइ नेपालमा शैक्षिकरुपमा अगाडि बढ्नु सकरात्मक रहेको छ । अहिले पर्यटनबारे अध्ययन गर्न विभिन्न मुलुकका पर्यटक नेपाल आउने गरेका छन् ।’